«Ризқларнинг гўзали молу дунё эмас, балки – руҳ хотиржамлиги, ақл нури, баданнинг соғлиги, қалб самимийлиги, фикрнинг саломатлиги, она чақириғи, отанинг илтифоти, ака-уканинг борлиги, бола кулгиси, дўстнинг аҳамияти, Аллоҳ йўлида муҳаббат қилувчи дўстнинг даъватидир. Аллоҳ мана шундай ризқ билан неъматлантирсин!»
Муҳаммад Мутаваллий Шаъровий
Афсуски, ризқ деганда кўпчилик фақатгина озиқ- овқат, кунлик егулик, молу дунё деган нарсаларни тушунади.
Кунлик егулиги бўлсада, ортиқча ҳою-ҳаваслари амалга ошмагани учун ўзини камситилгандек ҳис қилади. Аммо Яратган берган гўзал ризқларини унутади…
Қанчадан қанча молу дунё соҳиблари борки, руҳ хотиржамлиги – ҳаловати йўқ.
Мол-дунёси билан дунёни бошқаришга ҳаракат қилаётган, бироқ ақл йўналтириши керак бўлган иймон неъматидан бегона, фикрлари бузғунчилик, қалбида бошқаларга нисбатан нафрат, ота – она меҳридан ҳам, хизматидан ҳам бебаҳра, жажжи фарзандлар кулгисини, қаердадир унга интиқ бўлган яқин қардошини ёки муниса опа-синглисини ҳис қилолмаётган, дўстининг аҳамиятини сезмаётганлар қанча…
Дарҳақиқат, инсонни шукрга ундовчи неъматларнинг бири тафаккурдир.
Бизларга ризқларнинг гўзали ва тафаккур неъматини берган Роббимизга ҳамду-санолар бўлсин! Алҳамдулиллаҳ!
Ангрен шаҳар “Қорабоғ” жоме масжиди
имом-хатиби Бобохонов Яҳёхон

Fitrat.uz Ўзбекистон мусулмонлари идораси Тошкент вилояти вакиллиги