НАМОЗ – НАЖОТ

Аллоҳ намоздадир, Аллоҳ намоздадир. Ким намозни тарк қилса, унга Исломда насиба йўқ. Ким намозни адо этса, Аллоҳ уни асрайди. Ким намозни тарк этса, Аллоҳ уни зое қилади.

Умар ибн Хаттоб

Намоз – улуғ ибодат. Аллоҳ таоло билан руҳий-маънавий мулоқот чоғи. Яна банда қуллигининг амалий ифодасидир. Рўза, закот ва ҳаж йилда бир марта адо этилса, банданинг бўйнидан соқит булади. Намоз эса кечаю кундуз бандани елкасида туради. Пайғамбаримиз соллаллоҳу алайҳи васаллам намозга жуда қаттиқ аҳамият берганлар. У зотга эргашган саҳобалар, тобеъинлар ва азизларимиз намоз ўқишни бу дунёнинг ҳар қандай лаззатидан устун кўришган.

Нафс шайтонга улфат ўлароқ ҳеч қачон эгасини тўғри йўлга етакламайди, асло нажот манзили сари юргизмайди. Банданинг намозсиз ҳаётидан хурсанд бўлади. Банданинг мақсади Аллоҳ розилиги бўлса, ана шу мақомга етиш учун намоз энг тўғри йўлдир.

Авн ибн Абдуллоҳ: «Агар банда қабрига қўйилса, биринчи бўлиб сўраладигани – намоздир. Агар намози яроқли топилса, унинг бошқа амалларига қаралади. Бордию яроқсиз бўлса бошқа бирон амалига қаралмайди», – деган. Намознинг катта фойдаси биз қабрга кирганимиздан кейин билинади. Ўша кун олдимизда турган экан, банда шу кунга яқинлашиб келаётган экан, тайёргарлик кўрмаслик оқил кишининг иши эмас. Оддий бир байрам учун ҳам қанчалар ҳозирлик кўришимиз ҳаммага маълум.

Аллоҳ таоло Қуръони Каримда шундай марҳамат қилади: «Эй, имон келтирганлар! На мол-дунёларингиз ва на фарзандларингиз сизларни Аллоҳнинг зикридан (Унга ибодат қилишдан) чалғитиб қўймасин! Кимки шундай қилса, бас, ана ўшалар зиён кўрувчи кимсалардир!» (Мунофиқун сураси, 9-оят )

Нафсимиз ҳар қанча чалғитмасин намозда қойим бўлишга ҳаракат қилайлик. Бу дунёда ҳам, охират ҳаётида ҳам нажот топиш учун намозда бардавом бўлайлик.

Мол-дунё, бола-чақа ва тирикчилик ҳар қанча чалғитмасин, Аллоҳ таоло биз учун улуғ ибодат бўлмиш НАМОЗни адо этишни умримизнинг сўнгги онига қадар ҳаммамизга насиб этсин.

Оҳангарон тумани “Чил қори” жоме масжиди

имом-хатиби Орифжон Хусенов